Hammock Magazine-ის რებრენდინგის შესახებ

სულ ცოტა ხნის წინ Hammock Magazine-მა მკითხველებს ჟურნალის განახლებული იმიჯი წარუდგინა. გრაფიკულმა დიზაინერებმა - მაშო ნარტყოშვილმა და მეკო ჭიკაძემ ჟურნალის ახალი სამეტყველო ენა შეიმუშავეს და სრული რებრენდინგის შედეგად Hammock Magazine-ს კიდევ უფრო დახვეწილი ვიზუალური იდენტობა შესძინეს.

ინტერვიუში მაშო და მეკო რებრენდინგზე მუშაობასთან დაკავშირებულ საკითხებს დაწვრილებით გვაცნობენ. გრაფიკული დიზაინერები თავიანთ პროფესიულ გამოცდილებასაც გვიზიარებენ და იმ ძირითად ელემენტებზე ამახვილებენ ყურადღებას, რომლებმაც ჟურნალის ახალი ვიზუალური სახე განსაზღვრა.


 

გვესაუბრეთ თქვენი საერთო საქმისა და საერთო გეგმების შესახებ...

 

მაშო:  მე და მეკომ ერთმანეთი Windfor’s Tbilisi-ში გავიცანით. როდესაც მე Holmes and Watson-იდან Windfors-ში გადავედი, მეკო იქ დამხვდა. ორივე გრაფიკულ დიზაინერებად  ვმუშაობდით, ეტაპობრივად კი Senior Graphic Designer-ების პოზიციაზე გადავინაცვლეთ. 

ყოველდღიურობაში სულ ვამჩნევდით, რომ ერთად მუშაობა ორივესთვის სასიამოვნო იყო და პროცესი მარტივად მიმდინარეობდა. ერთმანეთისგან სრულიად განსხვავებული ადამიანები ვართ - რაც გარკვეულ ბალანსს ქმნის ჩვენს სამუშაო პრაქტიკაში - თითქოს ვავსებთ ერთმანეთს. ამ ყველაფერმა გავლენა იქონია ჩვენს, როგორც დიზაინერი წყვილის, ჩამოყალიბებაზე. პანდემიის დასაწყისში, როცა პირველად გამოგვკეტეს სახლებში - ძალიან რთული იყო მუდმივ იზოლაციაში მუშაობა - სულ ერთ სივრცეში მიწევდა ტრიალი, სამსახურის საქმეებზეც და “ფრილანს” პროექტებზეც. ამან გარკვეული მარტოსულობის შეგრძნება გამიჩინა. მეკოც იგივე მდგომარეობაში იყო. მაშინ პირველად გაჩნდა იდეა, რომ “ფრილანს” პროექტი ერთად აგვეღო. შედეგად, ძალიან პროდუქტიული და საინტერესო სამუშაო პროცესში ჩავერთეთ, საბოლოო პროდუქტიც ძალიან ნაყოფიერი გამოვიდა. ფაქტობრივად, ერთის ნაცვლად, ორი ჩამოყალიბებული დიზაინერი მუშაობდა პროექტზე. ყოველი მომდევნო პროექტი წინაზე უფრო საინტერესო და სასიამოვნო იყო.  ჩვენი ერთად მუშაობაც მოვლენების ამგვარმა განვითარებამ განაპირობა. ამ ეტაპზე ორი დამოუკიდებელი დიზაინერი ვართ, რომლებიც ვთანამშრომლობთ და ერთად ვმუშაობთ პროექტებზე. მომავალში სტუდიის ჩამოყალიბებას ვგეგმავთ და საკმაოდ ბევრი საინტერესო იდეა გვაქვს. ჩვენი ნამუშევრების ხილვა ამ ბმულზეა შესაძლებელი: https://www.instagram.com/mesh.grafik/

საყვარელი პროექტი, რომელიც ერთობლივად განახორციელეთ…

 

მეკო:  ვფიქრობ, ჩვენზე, როგორც  დიზაინერთა წყვილის ჩამოყალიბებაზე დიდი გავლენა სააგენტომ იქონია. დიზაინზე მუშაობის პროცესები იქ სხვანაირად მიმდინარეობს და ყველაფერს გუნდურობის სული ახლავს. Როცა ერთ დიზაინ “ბრიფზე” ორი ინდივიდუალური გონება მუშაობს, შედეგიც ყოველთვის ცოტა ექსპერიმენტული და განსხვავებულია. ჩვენთვის  კი ეს პროცესი მნიშვნელოვანია და, შედეგად, ყოველთვის საინტერესო გადაწყვეტილებამდე მივდივართ. ასე დაგვიგროვდა პორტფოლიოში უამრავი საინტერესო პროექტი. ახლა კი ამ სიას Hammock-იც შეემატა. Პროექტის მნიშვნელობას ჩვენთვის მასზე მუშაობის მთლიანი პროცესი განსაზღვრავს - დამკვეთის ინტერვიუდან საბოლოო პრეზენტაციამდე. Შემდეგი ეტაპი უკვე დაკვირვებაა - როგორ მუშაობს შექმნილი დიზაინი რეალურ დროში, არხებსა და მასალებზე. ამ ეტაპების გავლის შემდეგ მოდის გრძნობა, როცა თვლი, რომ პროექტი შედგა. დღეს, როცა უამრავი ახალი კონცეფციის ბრენდი იქმნება, დიზაინზე მუშაობაც უფრო საინტერესოა.

 

 

რა იყო მთავარი შთაგონება Hammock-ის ახალ დიზაინზე ფიქრის დროს?

 

მაშო:  მთავარი შთაგონება თავად Hammock-ი იყო. დაარსების დღიდან მახსოვს ეს ჟურნალი და მისი განვითარების ყველა ნაბიჯს ვაკვირდებოდი, ამიტომ, როდესაც პირველად შევთანხმდით, რომ ამ ბრენდის რებრენდიგზე უნდა გვემუშავა, ძალიან გამიხარდა. არც ისე მარტივია ახალი იმიჯის შექმნა ბრენდისთვის, რომელიც ასე მკაფიოდ არის დამკვიდრებული ბაზარზე. პრინციპში, ეს იყო მთავარი გამოწვევა -  ვიზუალურ მიმართულებას მაქსიმალურად გამოეხატა Hammock-ის ხასიათი და ლოგიკური გაგრძელება ყოფილიყო ბრენდისთვის. 

 

მუშაობის დაწყებამდე, ორი მნიშვნელოვანი ფაქტი განვსაზღვრეთ - ჟურნალის ხასიათი და ტონი, რომელიც საკმაოდ პოზიტიური და მრავალფეროვანია და ჟურნალის სახელის კონცეფცია, რომელიც რიგით პოზიტიურ გამოცდილებას - ჰამაკში წოლას მოიაზრებს. სწორედ ამ ინფორმაციებმა მოგვცა ფიქრის მიმართულება და მიგვიყვანა საბოლოო კრეატიულ კონცეფციამდე - რომელსაც შემდეგში ვიზუალური ბრენდინგიც მოერგო.

 

კრეატიულ კონცეფციას ასე ჩამოვაყალიბებდი:

 

ნეგატიური და მოსაწყენი ინფორმაციებით სავსე სამყაროში Hammock-ს მნიშვნელოვანი როლი აქვს - გაუზიაროს საინტერესო, რელევანტური, პოზიტიური და საგანმანათლებლო კონტენტი მკითხველს. სწორედ ამიტომ გადავწყვიტეთ, რომ ბრენდის ვიზუალური იდენტობა ისეთ ვიზუალურ ასოციაციებზე აგვეგო, რომლებიც ადამიანებში პოზიტიურ ემოციებსა და განწყობებს აღვიძებს - მინიშნებები სიტუაციებსა და მოვლენებზე, სადაც თავს ბედნიერად, მოდუნებულად და მშვიდად ვგრძნობთ. Hammock-ი კი ამ ყველა პოზიტიური გამოცდილების ქვაკუთხედია.

როგორ წარმოგედგინათ ჟურნალის ვიზუალური მხარე უშუალოდ მუშაობის პროცესის დაწყებამდე? 

მეკო:  “ბრიფის” დამუშავების დროს გონებაში უკვე გვქონდა გარკვეული ვიზუალური მიმართულებები. როცა ბრენდს აქვს გამორჩეული ნიშა და სახელი, ამას უკვე ბუნებრივად მიჰყავხარ კონკრეტული მიმართულებით. დიზაინი მაქსიმალურად უნდა უპასუხებდეს იმ ამოცანებს, რასაც ბრენდი ისახავს. მუშაობის პროცესში მუდმივად ვნახულობდით Hammock-ის კონტენტს, ვაანალიზებდით საკომუნიკაციო ტონალობას, რადგან გრაფიკული დიზაინი ვიზუალური კომუნიკაციის ენაა. შთაგონებაც ისევ ბრენდის ხასიათიდან და მასთან ასოცირებული ემოციებიდან მოვიდა. ვფიქრობ, ახალი ბრენდინგი მაქსიმალურად გამოხატავს Hammock-ის ხასიათს და დამოკიდებულებას იმ ფაქტებისა და მოვლენების მიმართ, რასაც აშუქებს. ახალი ვიზუალური სტილი, რომლითაც ბრენდი გააგრძელებს კომუნიკაციას, პირდაპირ ვიზუალურ ტრანსლირებას გაუკეთებს იმ მესიჯებს, რისი მიტანაც მომხმარებლამდე სურს. სწორედ ამ დიზაინერულ გადაწყვეტას ვეძებდით “ბრიფზე” მუშაობის პროცესში.



რამდენად გამოხატავს რებრენდინგი ჟურნალის კონცეფციას?

 

მაშო:  ვფიქრობ, რებრენდინგი ბრენდის ლოგიკური გაგრძელება უნდა იყოს. Hammock-ი უკვე იმ სიმაღლეზე იყო, რომ ძლიერ და გამართულ ვიზუალურ იდენტობას მოითხოვდა. ვიზუალურ იდენტობას კი, თავის მხრივ, ჟურნალის კონცეფციისთვის უნდა ეპასუხა და გაეძლიერებინა. სწორედ ამ ორი პუნქტის შესრულებას შევეცადეთ შეგრძნებების კონცეფციით და ვფიქრობ, გამოგვივიდა კიდეც. ამიერიდან ვიზუალური კომუნიკაციის ტონალობაც ზუსტად ის იქნება, რაც ჟურნალის კონტენტის ტონალობაა. 



რა პრინციპით აირჩიეთ ლოგოს დიზაინი? 

 

მაშო:  ბრენდინგზე მუშაობისას ერთ-ერთ მთავარი მოცემულობა დიზაინ-ბრიფია, რომლის მიხედვითაც ვითარდება სამუშაო პროცესი. ჩვენი დიზაინ-ბრიფის ერთ-ერთი მთავარი მოცემულობა ლოგოს რედიზაინი იყო, ანუ ახალ ლოგოტიპს ძველთანაც უნდა ჰქონოდა ლოგიკური კავშირი და თან მისი ერთგვარი გაგრძელებაც უნდა ყოფილიყო. 


იქიდან გამომდინარე, რომ Hammock-ი ონლაინჟურნალია, ლოგოტიპი მეტ-ნაკლებად ციფრული უნდა ყოფილიყო და მარტივი მოხაზულობა ჰქონოდა. შესაბამისად, შენარჩუნდა ძველი ლოგოს ხასიათი და საერთო სილუეტი, მაგრამ შეიცვალა ასოების მოხაზულობა. წარწერა გათანამედროვდა და გამარტივდა. გახდა უფრო დასამახსოვრებელი და მარტივად წასაკითხ-აღსაქმელი.



ვინაიდან Hammock-ს საკმაოდ ბევრ მედიუმში უწევს მოღვაწეობა, საჭირო იყო, რომ გარდა მთავარი ლოგოტიპისა, სხვადასხვანაირი გამოყენების ლოგოტიპებიც ჰქონოდა, რომლებიც გარკვეულწილად, კომუნიკაციისას მთავარი ბრენდ-ატრიბუტებიც იქნებოდნენ. სხვადასხვანაირი გამოყენების ლოგოტიპები უფრო მრავალფეროვანს ხდის ბრენდის ვიზუალურ იდენტობას - მრავალფეროვანი ვიზუალური იდენტობა კი, ჰემოქის ხასიათიდან გამომდინარე, ძალიან მნიშვნელოვანია.



რა პრინციპით აირჩიეთ ფერები, რომლებიც ახალ დიზაინში ჭარბობს? 

 

მეკო:  ფერები დიზაინში დიდ როლს თამაშობს. სწორედ ფერთა გამა ქმნის პირველად შთაბეჭდილებას და ხასიათს ბრენდის ვიზუალურ იდენტობაში. ფერების ამ კომბინაციით ბრენდის ვიზუალურ სტილში ხალისიანი და ამავდროულად, მშვიდი ტონალობა შემოვიტანეთ. ეს ტონალობები გარკვეული კავშირებია ჩვენს გონებაში არსებულ კადრებთან. ეს იყო მთავარი მიმართულება ფერთა გამაზე მუშაობის პროცესში. შესაბამისად, მივიღეთ  ნათელი და ამავდროულად, პასტელური ფერთა ტონალობები. გარკვეული აქცენტის შემოსატანად შავი ფერი და მისი ტონალობებიც გამოვიყენეთ. ახლა კი გვაქვს ფერთა სქემა, რომელიც გრაფიკულ ელემენტებთან ერთობლიობაში გარკვეული კონტრასტის შექმნის საშუალებას გვაძლევს.













ავტორი : ანა გაბისიანი