საქართველოს ეროვნულ პავილიონს ვენეციის 59-ე საერთაშორისო გამოფენაზე თბილისში მცხოვრები და მომუშავე მხატვრების, მარიამ ნატროშვილის და დეთუ ჯინჭარაძის პროექტი - „მე ვწუხვარ ბაღზე“ წარადგენს.

„მე ვწუხვარ ბაღზე“ მოგვითხრობს დასასრულის წინათგრძნობაზე. დიდი ზომის ვიდეოინსტალაცია და VR  მნახველს ანთროპოცენის ეპოქის მაგიურ რეალიზმში იწვევს. ბუნებრივი და კულტურული ლანდშაფტების მოსალოდნელ ცვლილებებს მხატვრები ვირტუალური რეალობის ენაზე თარგმნიან, მედიუმის, რომელშიც ბოლო 3 წლის განმავლობაში მუშაობენ. 

VR-ის მთავარი სცენა გადაშენებული მცენარეების ბაღია. ვირტუალური ბაღი - ადამიანის ჩარევის შედეგად გამქრალ მცენარეებს აერთიანებს. აჩრდილების ბაღი, ეკოლოგიური კრიზისი, როგორც დასასრულის ერთ-ერთი ნიშანი. უკანასკნელ 250 წელიწადში დედამიწაზე, სხვადასხვა ადგილებში, 600-მდე მცენარე გაქრა.

ვიდეონამუშევარში ვიზუალური რიგითობა წინასწარ განსაზღვრული არ არის და თვითგენერირებადია. ვიდეოთამაშის პლატფორმაზე აწყობილი VR  ინტერაქციულია. “მე ვწუხვარ ბაღზე” მაყურებელს თხრობის მითოლოგიურ-პოეტური ფორმებით მოდელირებულ იმერსიულ გარემოში აქცევს. ეს არის პოეტური ნაწარმოები, რომელიც ტექნოლოგიური ეპოქით განპირობებული ახალი სიურრეალიზმის ენით დასასრულსა და დასაწყისზე გვესაუბრება. 

პროექტის, “მე ვწუხვარ ბაღზე” წარმდგენი პლატფორმაა „მდგომარეობებს შორის”, მისი დამფუძნებლების - ვატო ურუშაძის, ხატია ჭოხონელიძის და გიორგი სპანდერაშვილის კურატორობით. აღსანიშნავია, რომ წლევანდელ პროექტს კურატორობას უწევს პლატფორმა, კურატორების ერთობა და არა ცალკეული კურატორი, როგორც აქამდე იყო მიღებული. „მდგომარეობებს შორის” - მულტიმედია სახელოვნებო პრაქტიკაზე დაფუძნებული დამოუკიდებელი პლატფორმაა, რომელიც მედია-ხელოვნებას, ტექნოლოგიებს, მეცნიერებას და თანამედროვე კულტურის სხვა სინთეზურ მოცემულობებს აერთიანებს. პლატფორმის ფუნქციონირების მთავარ პრინციპი კომპლექსური კურატორული მიდგომაა, რომელიც მიზნად ისახავს ახალი გამომსახველობითი და რეპრეზენტაციული ფორმების კვლევას. “მდგომარეობებს შორის” 2018 წელს დაფუძნდა და მას შემდეგ ყოველწლიურად მართავს ფართო მასშტაბის გამოფენებს, რითაც ხელს უწყობს საქართველოში ახალი მედია-ხელოვნების განვითარების კონტექსტის შექმნას. www.inbetween.media

2021 წლის 5 ოქტომბერს საქართველოს კულტურის სამინისტრომ გამოაცხადა კონკურსი 2022 წლის ვენეციის ბიენალეზე საქართველოს ეროვნულ პავილიონში წარსადგენი პროექტის შესარჩევად.  გამარჯვებული პროექტი კონკურსის გზით გამოვლინდა. საქართველოს ეროვნული პავილიონისთვის საგამოფენო სივრცე (Spazio Punch) კუნძულ ჯუდეკაზე შეირჩა.საქართველოს ეროვნული პავილიონი დამთვალიერებელს 2022 წლის 23 აპრილიდან 27 ნოემბრამდე უმასპინძლებს.

მხარდამჭერი: საქართველოს კულტურის, სპორტისა და ახალგაზრდობის სამინისტრო

კომისარი: მაგდა გურული

მხატვრები: მარიამ ნატროშვილი და დეთუ ჯინჭარაძე

ორგანიზაცია: „მდგომარეობებს შორის”

კურატორები: გიორგი სპანდერაშვილი, ხატია ჭოხონელიძე, ვატო ურუშაძე

ადგილობრივი პარტნიორი: Nuova Icona

პარტნიორი: Spazio Punch

ხმის დიზაინერი / კომპოზიტორი: დავით ხორბალაძე

CTO: ალექს ლაშხი, StormBringer Studios OÜ

გამოფენის დიზაინერი: ლუკა მუროვეკ (ჩ), raumlaborberlin

კონსულტანტ/ბიოლოგი გადაშენების პირას მყოფი მცენარეების საკითხებში:

რაფაელ გოვართსი, Head of Plant & Fungal Names, Royal Botanic Gardens, Kew (UK)

ტექსტის რედაქტორი: გაბრიელ ადამსი

ექსპოზიციის დიზაინისა და არქიტექტურის მიმართულებით პროექტის გუნდი თანამშრომლობს კომპანია raumlaborberlin-თან, რომელიც მრავალი საერთაშორისო პრიზის, მათ შორის, 2021 წლის ვენეციის არქიტექტურის ბიენალეს ოქროს ლომის მფლობელია.