Europalia - ხელოვნების ერთ-ერთი უმნიშვნელოვანესი ფესტივალია, რომელიც ყოველ 2 წელიწადში ერთხელ იმართება და კონკრეტულ მოწვეულ ქვეყანასა და მის კულტურულ მემკვიდრეობას წარმოადგენს. წელს ფესტივალი საქართველოს, მის კულტურასა და ხელოვნებას ეთმობა.
ფესტივალს გამოფენა “ავანგარდი საქართველოში (1900-1936)” გახსნის. რუსეთის იმპერიის დაცემისა და ოქტომბრის რევოლუციის შემდეგ, 1918 წელს საქართველომ დამოუკიდებლობა გამოაცხადა. მიუხედავად იმისა, რომ იმ პერიოდში ბედნიერ მირაჟად წარმოდგენილი თავისუფლება მხოლოდ 3 წელს, 1921 წლამდე, საბჭოთა ჯარების შემოჭრამდე გაგრძელდა, მცირეხნიანმა დამოუკიდებლობამ ქვეყანაში ავანგარდული ხელოვნების ჩამოყალიბებასა და განვითარებას შეუწყო ხელი. ქუთაისისა და თბილისის არაერთ კაფესა და ტავერნაში მხატვრები და სხვა არტისტები იკრიბებოდნენ და აწყობდნენ მულტიდისციპლინარულ ღონისძიებებს, რამაც ხელი შეუწყო ახალი მხატვრული მიმართულებების დანერგვას. მრავალრიცხოვან არტისტთა თანამშრომლობამ საქართველოში ხელოვნების მრავალი ფორმა წარმოშვა, ქართული ტრადიციების დასავლურ და აღმოსავლურ ტრადიციებთან შერწყმით გაჩნდა ისეთი მიმდინარეობები, როგორიც არის ნეოსიმბოლიზმი, ფუტურიზმი, დადაიზმი, ექსპრესიონიზმი და კუბო-ფუტურიზმი. მათი ინტერაქცია კი გამოიხატებოდა ნახატებში, ფილმებში, სპექტაკლებში, მწერლობასა და ფოტოგრაფიაშიც კი.
გამოფენაზე მე-20 საუკუნის დასაწყისში შექმნილ ნამუშევრებთან ერთად წარმოდგენილი იქნება თანამედროვე ქართველი მხატვრის, მეგი რუსტამოვას ფილმი “დედა ენა”, რომელიც სტალინის რეჟიმის დროს - 1950-იან წლებში თბილისიდან ყაზახეთში დედის გადასახლებაზე მოგვითხრობს.
ფოტო: Europali
დაწერე კომენტარი