სიტყვა "დასვენება" ამ ბოლო დროს ჩემთვის მთასთანაა დაკავშირებული, განსაკუთრებით ზაფხულში - სუფთა ჰაერი, სასიამოვნო ტემპერატურა, ბუნებასთან სიახლოვე, საინტერესო აქტივობები, რესტორნები გემრიელი კერძებით და კომფორტული სასტუმროები - ყველაფერი კარგი დასვენებისთვის. Hammock Magazine Visa-ს და M.T.A.-ს მხარდაჭერით საქართველოს მთის კურორტების გზამკვლევებს შემოგთავაზებთ. საუკეთესო სასტუმროები, რესტორნები, ღირსშესანიშნაობები და აქტივობები - გზამკვლევებში მოგზაურობისთვის საინტერესო და საჭირო ინფორმაციას გაეცნობით. პირველი გაჩერება გუდაურია, კურორტი, რომელიც არა მარტო ზამთარში, არამედ ზაფხულშიც მიმზიდველი ადგილია დასასვენებლად.
Gudauri Lodge
ზღვის დონიდან 2,200 მეტრზე, მზესთან ახლოს, ალპური მდელოები, ფერადი მინდვრის ყვავილები, სუფთა ჰაერი და თვალწარმტაცი ხედები - ასეთია ზაფხულში გუდაური. იმისათვის რომ ეს ყველაფერი კარგად შეიგრძნოთ, ვფიქრობ, თავდაპირველად შესაბამის ადგილას უნდა დაბინავდეთ. Gudauri Lodge - ერთ-ერთი საუკეთესოა გუდაურის სასტუმროებიდან. ეს არის მინიმალისტური დიზაინის მქონე სასტუმრო Concept Store-ით, ენოთეკით, ბარით, რესტორნით, კომფორტული ნომრებით, აუზითა და სპათი. გამორჩეულია აუზთან ახლოს, ღია სივრცეში მდებარე ჯაკუზი, რომელიც საუკეთესო საშუალებაა განტვირთვისთვის.
Marco Polo
გუდაურის პირველი სასტუმრო - 1988 წელს გახსნილი მარკო პოლო აქტუალობას დღემდე არ კარგავს. დახვეწილი არქიტექტურის მქონე ისტორიული სასტუმრო დამსვენებელს არაერთ თავშესაქცევ აქტივობას სთავაზობს. მათ შორისაა პადელის შიდა და გარე მოედნები, ბოულინგი, ბილიარდი, ღია და დახურული აუზები და სპა სხვადასხვა თერაპიული და გამაჯანსაღებელი პროცედურებით.
Quadrum
ზედა გუდაურში საინტერესო არქიტექტურის მქონე დიზაინ-სასტუმრო - კვადრუმი მდებარეობს. ხის კონტეინერებში განთავსებული ნომრებიდან თვალწარმტაცი ხედები იშლება. აქვეა სასტუმროს ახალი შენობა მწვანე გადახურვით, რომელიც ჰარმონიულად ერწყმის გარემოს. კვადრუმის ახალ ნაწილში აღმოაჩენთ მაია სუმბაძის ნამუშევრებს, ვაჟა მიქაბერიძის (პრასტოს) სკულპტურას და “ფუნდუკის” ავეჯს. აქვეა იოგას ოთახი, აუზი და ფინური საუნა.
პარაპლანით ფრენა
გუდაური დამსვენებლებს ზაფხულის განმავლობაში არაერთ საინტერესო აქტივობას სთავაზობს. ერთ-ერთი გამორჩეულია პარაპლანით ფრენა. ფრენები გუდაურის გასასვლელიდან მიმდინარეობს კანიონის მიმართულებით. შთამბეჭდილებები ნამდვილად დაუვიწყარია.
მათ, ვისაც პარაპლანით ფრენა ჯერ არ გადაგიწყვეტიათ, გთავაზობთ კვადროციკლებით გაისეირნოთ. Ride Gudauri-ს კვადროციკლებს ასევე გუდაურის გასასვლელთან შეხვდებით და გირჩევთ გეზი ახალი ტბისკენ აიღოთ. ტბაზე გამორჩეული აქტივობით - ვეიქბორდინგით შეგიძლიათ ისიამოვნოთ.
ფეხით სიარულისა და ლაშქრობის მოყვარულებს გთავაზობთ ახალი მარკირებული სალაშქრო ბილიკები მოინახულოთ, რომლებიც კურორტს გასულ წელს დაემატა.
საბაგირო
საბაგიროები ზაფხულშიც ფუნქციონირებს და გირჩევთ, აუცილებლად გაისეირნოთ და დატკბეთ შთამბეჭდავი ხედებით. ასევე შეგიძლიათ საბაგიროთი გუდაურიდან კობში გადახვიდეთ.
თუ ყაზბეგისკენ მანქანით აპირებთ წასვლას, გზად ბიდარას ტრავერტინებთან შეჩერდით და მოინახულეთ ბუნების ეს სილამაზე.
Rooms Kazbegi
კობთან ახლოს ყაზბეგია. გირჩევთ, აუცილებლად ესტუმროთ სასტუმრო Rooms-ს - დახვეწილი დიზაინი, გემრიელი კერძები, ტერასა, აუზი და ნომრები თვალწარმტაცი ხედებით.
მაისი
და ბოლოს, გემრიელი ვახშამი ახალ გახსნილ რესტორან “მაისში”, რომელიც Rooms-იდან მანქანით რამდენიმე წუთის სავალზე, სოფელ გერგეთში მდებარეობს. დააგემოვნეთ შეფმზარეულ კატო ვაშაყმაძის განსაკუთრებული ხედვით შექმნილი ადგილობრივი კერძები მოგზაურობის გემრიელი და დასამახსოვრებელი დასასრულისთვის.
დაწერე კომენტარი