ესპანეთში, ბარსელონაში მდებარე Pavelló Mies van der Rohe-ს საგამოფენო სივრცემ 17-20 თებერვალს 6 ქვეყნის შემოქმედებს უმასპინძლა, რომლებმაც წარმოდგენილი ნამუშევრებით ჩამოაყალიბეს ინდივიდუალური ნარატივები, კონტექსტური დისკურსი და თითოეულმა საკუთარი ხედვით ასახა ადამიანის გამოცდილება ბუნებრივ სამყაროში.
პროექტი მიზნად ისახავს გახდეს ცოდნისა და იდეების გაცვლის პლატფორმა არქიტექტორებს, ურბანისტებს, მხატვრებს, მკვლევრებს, სხვა დაინტერესებულ პირებსა და ორგანიზაციებს შორის მსოფლიოს სხვადასხვა კუთხიდან.
გიორგი როდიონოვი, კურატორი:
,,ნამუშევრის იდეა გაჩნდა რამდენიმე თვის წინ, გვინდოდა, შეგვეკრიბა ხელოვანები, რომელთაც მოუწიათ ჩვენი რეგიონის დატოვება და გადასახლდნენ ევროპაში იმის გამო, რომ არ ჰქონდათ რეალიზების საშუალება ჰომოფობიური სიტუაციიდან გამომდინარე.
მეტ ყურადღებას ვამახვილებთ Queer ღვთაებებზე, რომლებიც წლების წინ არსებობდნენ ჩვენს რეგიონში და ძლიერი კავშირი ჰქონდათ ბუნებასთან, გენდერს არ ჰქონდა გადამწყვეტი მნიშვნელობა და რეალურად, უფრო თავისუფლად ხდებოდა როგორც საუბარი ყველა თემაზე, ისე ბუნების მეტაფორული შემოტანა ყოველდღიურობაში.
რაც შეეხება პრაქტიკულ მხარეს, ჩვენი პირველი ხელოვანი აზერბაიჯანელი ტრანს გოგონა - პარი ბანუ ასგარი იყო, რომელიც “უსახელო თბილისის” მიერ ორგანიზებული რეზიდენციის ფარგლებში ჩამოვიდა თბილისში. რეზიდენცია იმ ხელოვანებს ეხმარება, რომელთაც საკუთარი ქვეყნიდან საქართველოში გამოქცევა უწევთ. აზერბაიჯანის დატოვება მოუწია იმიტომ, რომ უწევდა გაუსაძლის პირობებში ცხოვრება არა მხოლოდ საზოგადოების მხრიდან, არამედ ოჯახიდანაც, თუმცა, სამწუხაროდ, თბილისშიც არ დახვდა სახარბიელო მდგომარეობა, ჩვენი ქვეყანაც თავისივე უსაფრთხოების გამო დატოვა და ესპანეთში, ბარსელონაში გადავიდა.
ჩვენს ნამუშევარს უმსაპინძლა Mies van der Rohe-ს პავილიონმა ბარსელონაში, სადაც მსოფლიოს წამყვანი არქიტექტორების, ხელოვანების ასეულობით ლეგენდარული ნამუშევარია წარმოდგენილი. ჩემთვის ძალიან მნიშვნელოვანია, რომ პირველი პერფომანსი სწორედ იქ გაიმართა და აღსანიშნავია, რომ შენობის სულისჩამდგმელიც იყო ემიგრანტი, გერმანიიდან იძულებით გამოქცეული.”
ფოტო: დათო ქორიძე
დაწერე კომენტარი