Coperni-ს შემოდგომა-ზამთრის 2024 წლის კოლექციიდან ყველაზე გამორჩეული და არაორდინალური აქსესუარის - Air Swipe ჩანთის დებიუტი პარიზის მოდის კვირეულზე გამართულ ჩვენებაზე შედგა. ჩანთა 99% ჰაერისა და 1% შუშისგან არის დამზადებული, NASA-ს ნანომასალით - სილიციუმის აეროგელით და თითქმის სრულიად გამჭვირვალეა.

IMG_4523.png 1.78 MB
დელიკატურ ნანომასალას შეუძლია ექსტრემალურ სიცხეს გაუძლოს და სანამ მოდის უახლეს მიღწევას ვიხილავდით, ეს მასალა NASA-მ ვარსკვლავური მტვრის შესაგროვებლად გამოიყენა. ჩანთის შექმნაზე ვიზუალურმა მხატვარმა და მკვლევარმა, ხელოვნებისა და მეცნიერების დარგის ერთ-ერთმა ლიდერმა - Ionis Muchaloudis-მა იმუშავა. ის არის პირველი მკვლევარი, რომელმაც ნასას სილიციუმის აეროგელი გამოიყენა და ჩართო სახვით ხელოვნებაში.
IMG_4557.jpeg 980.13 KB
Coperni-ს შემოქმედებითი გუნდი ღრუბლის მსგავს ჩანთას ახასიათებს, როგორც მსუბუქს, მდგრადს, ფუტურისტულსა და ფუნქციონალურს. მიუხედავად იმისა, რომ ჩანთა სულ რაღაც 33 გრამს იწონის, Air Swipe ყველაზე დიდი ობიექტია, რაც კი ოდესმე შექმნილა კოსმოსური ტექნოლოგიის ნანომასალისგან. 

IMG_4559.jpeg 107.03 KB
IMG_4558.jpeg 170.65 KB

Coperni-სთვის ახალი როდია არაორდინალურობა და ულტრათანამედროვე მიდგომები, ბრენდის 2023 წლის ჩვენებაზე სპრეი-კაბა ვიხილეთ, რომელიც ბელა ჰადიდმა წარადგინა, მოდელს ნახევრად შიშველ სხეულზე, სპეციალური ტექნოლოგიის გამოყენებით, ერთგვარად დაახატეს თეთრი კაბა. გარდა ამისა, Coperni-ს ეკუთვნის კაბები 3D პრინტიანი ყვავილებით და სარკეებიანი სამოსი. სწორედ მაღალ ტექნოლოგიებზე დაფუძნებული იდეების განხორციელების კიდევ ერთი უახლესი მაგალითია - 99% ჰაერისგან დამზადებული ჩანთა, რაც ადასტურებს ბრენდის მომავლის ხედვას მოდის ინდუსტრიაში. 


ფოტოების წყარო: Coperni, Vogue