თანამედროვე იაპონური ფოტოგრაფიის ერთ-ერთი ყველაზე სახელგანთქმული ფიგურაა ნობუიოში არაკი, რომელმაც პოპულარობა თავისი პროვოკაციული, თამამი და პერსონალური ცხოვრების ამსახველი ფოტოსურათებითა და პოლაროიდებით მოიპოვა და მთელ მსოფლიოს გააცნო თავი. მას ხშირად მოიხსენიებენ, როგორც სკანდალურ ფოტოგრაფს, რომლის შემოქმედება, ძირითადად, ეროტიკული სახის ნამუშევრებს, ქალის სხეულსა და შიშველ გამოსახულებებს აერთიანებს.
არაკის ნამუშევრები ძირითადად ქალების, ბავშვებისა და ყვავილების გამოსახულებებს აერთიანებს, მისი თვალით დანახული ყვავილები და ხილი ადამიანის სხეულის ნაწილებს მოგაგონებთ. გარდა კონცეპტუალური და ინტიმური ფოტოგრაფიისა, არაკი წლების განმავლობაში თანამშრომლობდა მოდის სახლებთან, როგორიცაა, მაგალითად, Saint Laurent და Givenchy, ასევე მის ობიექტივში ხშირად მოხვედრილა სხვადასხვა ცნობილი ადამიანი.
ნობუიოში არაკის ჯილდოები მრავალრიცხოვანია, მათ შორისაა იაპონიის ფოტოგრაფიული საზოგადოების ყოველწლიური პრესტიჟული პრიზი და Mainichi Art Award. მისი ნამუშევრები წარმოდგენილია სხვადასხვა რეტროსპექტივებსა და მუდმივ კოლექციებში მთელ მსოფლიოში. 500-ზე მეტი ფოტოწიგნისა და უამრავი გამოფენით, ნობუიოში არაკი აგრძელებს წარუშლელი კვალის დატოვებას ფოტოგრაფიის სამყაროში, იწვევს მაყურებელს, იმოგზაუროს მისი ფსიქიკის სიღრმეში და შეისწავლოს ადამიანის არსებობის სირთულეები.
ფოტოს წყარო: Artsy, Taka Ishii Gallery, AnOther Magazine, MutualArt
დაწერე კომენტარი