,,ქართული მუსიკალური მემკვიდრეობის” ახალი, მეექვსე გამოცემა - ინტერვიუ ნათია სართანიასთან

,,ქართული მუსიკალური მემკვიდრეობა / Georgian Music Legacy Collection” ნათია სართანიასა და ჯაბა შავიშვილის ფირფიტებზე დაფუძნებული ინიციატივაა, რომლის ფარგლებში დღესაც ფასეული და თანამედროვე მუსიკალური და კულტურული ღირებულების მქონე 90-იანი წლების ალბომები ცოცხლდება. ,,ქართული მუსიკალური მემკვიდრეობა” დაახლოებით წელიწად-ნახევრის წინ შეიქმნა და უკვე კოლექციაში ექვსი სრული გამოცემა და ფირფიტაა შესული. ახალი, მეექვსე გამოცემა Afternoon Version-ის ალბომს - Together-ს მოიცავს, რომლის შესახებ ვრცლად მოგვიყვება პროექტის ერთ-ერთი ინიციატორი, ნათია სართანია, რომელიც ასევე მუსიკისა და დიზაინის სკოლის, „შემოქმედებითი განათლების სტუდიის“ (CES) და CES Records-ის დამფუძნებელია და ქართულ მუსიკალურ ინდუსტრიაში მნიშვნელოვან ისტორიას ქმნის. 

,,ქართული მუსიკალური მემკვიდრეობის" ფარგლებში გამოდის ალბომები, რომელიც შექმნილია ადრეული 90-იანების ან გვიანი 80-იანი წლებიდან მოყოლებული, დაახლოებით 2005 წლამდე, რადგანაც ეს სწორედ ის პერიოდია, როდესაც ჩამოიშალა ყველაფერი, საბჭოთა კავშირის ნგრევის შემდეგ არ ფუნქციონირებდა არცერთი ინდუსტრია, შეუძლებელი იყო ალბომებისა და ფირფიტების გამოცემა, თუმცა ამ პერიოდში იქმნებოდა უნიკალური, თავისუფალი მუსიკა და სწორედ  ამ ეპოქაში შექმნილი მუსიკაა ჩვენს ფოკუსში. ფორმატი კი არის ალბომები ფირფიტაზე, რომელსაც ყოველ 3 თვეში ვუშვებთ.     ეს უკვე ჩვენი მეექვსე გამოცემაა წელიწად-ნახევარში, რომელიც 1 თვის წინ გამოვუშვით. ბოლო ალბომი არის 90-იანი წლების -1994 წელს დაფუძნებული, გამორჩეული ქართული ბენდის - Afternoon Version-ის 2000 წელს შექმნილი ალბომი - Together, რომელიც გამოირჩევა თანამედროვე და ინოვაციური ჟღერადობით. ქართული ალტერნატიული ელექტრონიკის ერთ-ერთი განმსაზღვრელი ჩანაწერი ,,ქართული მუსიკალური მემკვიდრეობის" ფარგლებში ფირფიტის ფორმატზე გამოიცა. იმ დროს, როცა ქვეყანაში არსებული სიტუაციის გამო შეუძლებელი იყო მუსიკალურ კარიერაზე ფიქრი, ბენდი დაიშალა და თითოეული მათგანი სხვადასხვა ქვეყანაში გადავიდა საცხოვრებლად. დღეს კი, ამდენი წლის შემდეგ, ძალიან სასიხარულო ფაქტია, რომ Afternoon Version ისევ შეიკრიბა და რამდენიმე დღის წინ კონცერტი გამართა.

მაგალითად, წინა გამოშვება იყო ,,შავი პრინცისა და ძებნილების’’ ალბომი, რომელიც სრულიად განსხვავებული ჟანრია და გახლდათ პირველი ჰიპ-ჰოპ ალბომი, რომელიც საქართველოში შეიქმნა. ყველა ახალი გამოცემა არის სრულიად უნიკალური, ერთმანეთისგან განსხვავებული და გამორჩეული, სხვადასხვა არტისტებისა და ბენდების ალბომები, რომლებსაც არაფერი აქვს საერთო  ერთმანეთთან, გარდა დროისა. ვცდილობთ, მაქსიმალურად სხვადასხვა ჟანრი წარმოვადგინოთ. 

ბოლო გამოშვების ფირფიტის დიზაინი ბენდის სოლისტს ეკუთვნის, მისი გადაღებული ფოტოა და თავიდანვე ამ ალბომს ჰქონდა იგივე ქავერი.  ვცდილობთ, რომ ალბომებს, რომლებსაც აქვთ ქავერი წლების წინ შექმნილი, პირვანდელი სახე სრულად შევუნარჩუნოთ და არ შევეხოთ. გამოგვიცია ალბომი, რომელსაც არ ჰქონდა ქავერი და ჩვენ შევქმენით, მაგრამ რომელსაც აქვს, შეუცვლელად ვიყენებთ. 

ფირფიტის შეძენა შეგიძლიათ Vodkast Records-ში, რომელიც ფაბრიკაში მდებარეობს, Morevi Records-ში. თუკი ბათუმში ხართ, Clime-ში და ჩვენს ბედქემფზე, ონლაინ.

ვფიქრობ, გამართლდა 100 პროცენტით და ალბათ მისმა მნიშვნელობამ გადააჭარბა კიდეც ჩემს მოლოდინს. მთელი ხიბლი ისაა, რომ რაც უფრო მეტ ალბომს ვუშვებთ და რაც უფრო გადის დრო, არქივი გროვდება და ივსება მრავალფეროვანი კოლექციით. დღეს უკვე ისეთი გულშემატკივრებიც გვყავს, რომლებიც თავიდანვე, პირველივე ალბომიდან მოგვყვებიან და აგროვებენ ყველა ფირფიტას, რასაც გამოვცემთ. არქივი ინახავს და შეინახავს უნიკალურ მუსიკას, რადგან არ ვჩერდებით და ყოველ სამ თვეში ახალ ალბომს გამოვცემთ.

რას გვეტყვით დღევანდელ, ქართულ მუსიკალურ ინდუსტრიაზე, თქვენი აზრით, რამდენად შეინიშნება ზრდა და ცვლილებები გასულ წლებთან შედარებით?

დღევანდელი, მუსიკალური ინდუსტრია საკმაოდ სწრაფი ტემპით ვითარდება საქართველოში, რაც ძალიან სასიხარულოა. არის უკვე ქართული სადისტრიბუციო კომპანიები, არტ მენეჯმენტის კომპანიები, სკოლები, კლუბები და ვენიუები, თავად არტისტები, რომლებსაც უდიდესი როლი აქვთ განვითარებაში. მგონია, რომ სწრაფი ტემპით ვეწევით გლობალურ მუსიკალურ ინდუსტრიას.

როგორც დააანონსეთ, პროექტის ფარგლებში, წელს მსმენელს საინტერესო გამოცემებს კიდევ უმზადებთ. რას უნდა ველოდოთ შემდეგ გამოცემებში? 

კურსი ზუსტად იგივე იქნება, ალბომების შესახებ უკვე ვიცით, თუმცა ამას წინასწარ არ ვამბობთ ხოლმე. რაც შემიძლია გითხრათ, არის ის, რომ შემდეგი ალბომი მოიცავს 90-იანი წლიდან 2005 წლამდე  ქართულ, თავისუფალ, დამოუკიდებელ მუსიკასა და მუსიკოსებს.

მე სწორედ 90-იანი წლების თაობა ვარ და შემიძლია ვთქვა, რომ ვცხოვრობდი და ვსუნთქავდი თავიდან ბოლომდე იმ ეპოქის მუსიკით. 90-იანების მუსიკოსები დღეს ხშირად იხსენებენ, რომ ძალიან ბნელ, რთულ დროს მუსიკა იყო ერთადერთი, რითაც ირჩენდნენ თავს და მეც ზუსტად ის ადამიანი ვარ, რომელიც მორალური და ფსიქოლოგიური გადარჩენის გზად მუსიკას ვხედავდი. თავიდან ბოლომდე მესმის, ვგრძნობ და ვიცი, რამხელა მნიშვნელობას და თავისუფლებას გვაძლევდა მუსიკა იმისთვის, რომ გადავრჩენილიყავით...

მაშინ ხუთი წლის ვიყავი, ბებია პიანისტი იყო და მისი დახმარებით ფორტეპიანოზე დაკვრა დავიწყე, მას შემდეგ სცენაზე ვიყავი, როგორც კლასიკური პიანისტი - ეს იყო ჩემი პირველი მუსიკალური კარიერა და დასაწყისი ძალიან პატარა ასაკში. დაახლოებით 16 წლის ვიყავი, როდესაც რადიოს დიჯეი გავხდი, შემდეგ ლონდონში წავედი და მოკლედ რომ ვთქვა, სულ ვმუსიკოსობ, თუმცა პროფილს ხშირად ვიცვლი. დღეს ორი მუსიკალური ლეიბლის დამფუძნებელი ვარ, მაქვს პირველი ელექტრონული მუსიკის სკოლა და ვცდილობ იმასაც, რომ ჩემი მუსიკა ვწერო.

სკოლა დაახლოებით 12 წლის წინ დავაფუძნე, დავიწყეთ ერთ პატარა  სტუდიაში, ახლა უკვე მესამე ადგილას ვართ - ფაბრიკაში და გვაქვს ხუთი სტუდია. ფანტასტიკურად ვვითარდებით, ჩვენი კომუნა იზრდება და ვფიქრობ, ერთ-ერთი ყველაზე დიდი მუსიკალური აუდიტორია გვყავს ჩვენს ქვეყანაში, ახალგაზრდები მოდიან და ვქმნით ჯანსაღ, შემოქმედებით გარემოს. გვემატება საინტერესო კურსები, ჩვენი მიზანი თავიდან უფრო ტექნიკური, ახალი ტექნოლოგიების გამოყენებით მუსიკის შექმნა იყო, თუმცა უკვე 3-4 წელია ვზრუნავთ იმაზე, რომ განვავითაროთ ის მიმართულება, რაც დღეს სჭირდება ინდუსტრიას და შემოვიტანეთ ისეთი კურსები, როგორიცაა მუსიკის ჟურნალისტიკა, მუსიკის ბიზნესის მენეჯმენტი და ასე შემდეგ. ჩვენს ბაზარზე შეიქმნა არაერთი პლატფორმა და CES Records, თავისთავად, რომელიც 5 წელია არსებობს და განსაკუთრებით უწყობს ხელს ჩვენი სტუდენტებისა და მათი მუსიკის პოპულარიზაციას. 

ამ ეტაპზე ძალიან ბევრი საქმე გვაქვს როგორც CES Records-ში, ისე სკოლაში. აქტიურად ვაგრძელებთ მუშაობას პროექტზე - ,,ქართული მუსიკალური მემკვიდრეობა". რა თქმა უნდა, ყოველი მათგანის მუდმივი განვითარება და ზრდა არის ჩემთვის პრიორიტეტული და ძალიან მნიშვნელოვანი, რომლისთვისაც ყოველდღიურად ვმუშაობთ და სამომავლოდაც ბევრ სიახლეს შემოგთავაზებთ.