შელი დიუვალის საუკეთესო როლები

ცნობილი ამერიკელი მსახიობი და კინოვარსკვლავი შელი დიუვალი 75 წლის ასაკში გარდაიცვალა, უნიკალური გარეგნობითა და გულწრფელი მანერებით იგი 1970-80-იანი წლების კინოს ერთ-ერთი განსამზღვრელი ფიგურა გახდა და კინოინდუსტრიას თავისი შესრულებული მრავალფეროვანი და საინტერესო ნამუშევრები დაუტოვა. მიუხედავად პოპულარობისა და ხალხის სიყვარულისა, დიუვალის კარიერა მისთვის ემოციურად მძიმე და საკმაოდ რთული აღმოჩნდა.  

შელი დიუვალი თავდაპირველად რეჟისორმა რობერტ ალტმანმა სრულიად შემთხვევით აღმოაჩინა წვეულებაზე, ალტმანის გუნდი ფილმ Brewster McCloud-ის გადასაღებად ემზადებოდა, როდესაც რეჟისორს 20 წლის დიუვალი გააცნეს, სწორედ მაშინ მიიღო მომავალმა მსახიობმა პირველი როლის შეთავაზება. როგორც დიუვალი აღნიშნავს, მას არ ჰქონდა განზრახვა, მსახიობი გამხდარიყო, ის სამეცნიერო კარიერაზე ფიქრობდა, თუმცა ამ შეხვედრამ მისი პროფესიული ცხოვრება სხვა მხრივ წაიყვანა და დიუვალმა პირველ ფილმში - 1970  წლის Brewster McCloud-ში ითამაშა, სადაც პიროვნული სტილის მთავარ ელემენტად დიდი ზომის წამწამები მოირგო და თავისი ხალისიანი თამაშით და ბუნებრივი ნიჭით მაყურებელს თავი გააცნო. 

მას შემდეგ დიუვალმა რობერტ ალტმანის არაერთ ფილმში ითამაშა, სწორედ ამიტომ მას ხშირად მოიხსენიებენ რეჟისორის მუზად. მონაწილეობა მიიღო ალტმანის ფილმებში - Thieves Like Us, Nashville, Popeye, McCabe & Ms. Miller, თუმცა ყველაზე დიდი პოპულარობა რობერტის ფილმებიდან დიუვალს 1977 წლის ფსიქოლოგიურმა ტრილერმა - 3 Women-მა მოუტანა, სადაც კალიფორნიის უდაბნოში მდებარე ხანდაზმულთა სახლის თანამშრომელი ქალი განასახიერა. საკუთარი იმპროვიზაციით თამაშის შედეგად დიუვალმა ამ როლისთვის, 1978 წლის კანის კინოფესტივალზე საუკეთესო მსახიობი ქალის ჯილდო მიიღო და გააძლიერა მისი, როგორც მსახიობის სტატუსი. 

ამავე წელს დიუვალი ვუდი ალენმაც შენიშნა და შესთავაზა როლი რეჟისორის შედევრად ქცეულ 1977 წლის რომანტიკულ დრამაში - Annie Hall-ში, რომელშიც მთავარ როლს დაიან კიტონი ასრულებს. დიუვალი არ იყო ფილმის მთავარი გმირი, მისი როლი ეპიზოდური იყო, სადაც როლინგ სტოუნის ჟურნალისტი განასახიერა, თუმცა მან ამ შესრულებისთვის კრიტიკოსების მოწონება დაიმსახურა და კიდევ ერთხელ მოახდინა შთაბეჭდილება საზოგადოებაზე. 

ამის შემდეგ კი იყო დიუვალის ყველაზე წარმატებული შესრულება, კარიერის მწვერვალი და საერთაშორისო პოპულარობის მომტანი ფსიქოლოგიური საშინელებათა ფილმი, 1979 წელს გადაღებული სტენლი კუბრიკის - The Shining. ალბათ ყველა ადამიანს, რომელსაც ერთხელ მაინც აქვს ნანახი ეს ფილმი, ახსენდება ერთ-ერთ საკულტო სცენად აღიარებული ეპიზოდი, სადაც დიუვალი ყვირის და შესანიშნავად ასრულებს როლს. ფილმში დიუვალი ჯეკ ნიკოლსონის ცოლის როლს ასრულებს და მისი შესრულებული თითოეული ეპიზოდი ძალიან საინტერესო და ბუნებრივია.

სწორედ The Shining აღმოჩნდა ის ფილმი, რომელმაც დიუვალს ფსიქოლოგიური პრობლემები გაუჩინა, ფილმის გადაღების პროცესში, კვირეების განმავლობაში, დიუვალი ყოველდღე საათობით ტიროდა იმისათვის, რომ როლი მაქსიმალურად ბუნებრივად გამოსვლოდა. გადაღებები 13 თვის განმავლობაში მიმდინარეობდა და მხოლოდ  დიუვალის ყვირილის სცენას 127 დუბლი დასჭირდა. The Shining ახლაც ითვლება ფილმად, რომელიც დიუვალთან და მის შესანიშნავ შესრულებასთან ასოცირდება, თუმცა სწორედ ამ ფილმმა იმოქმედა მსახიობზე ყველაზე მძიმედ, გამოსცადა მისი გამძლეობა, ნერვები და დიუვალის ფსიქიკაზე მნიშვნელოვანი გავლენა მოახდინა, რის შემდეგაც მსახიობი წლების განმავლობაში ცდილობდა რეაბილიტაციას.

მსახიობის 1980-იანი წლების პერიოდის მნიშვნელოვანი როლები და ცნობილი ფილმებია - Popeye, Time Bandits, Frankenweenie და Roxanne. მას შემდეგ დიუვალი გარკვეულ ეპიზოდურ როლებში და სატელევიზიო შოუებში მონაწილეობდა, 2002 წელს ითამაშა ფილმ  Manna from Heaven-ში და ამის შემდეგ ჩამოშორდა მსახიობობასა და კინოინდუსტრიას. 

დიუვალი წლების შემდეგ დაბრუნდა ეკრანზე, მისი უკანასკნელი როლი იყო სკოტ გოლდბერგის 2022 წლის საშინელებათა ფილმი - The Forest Hills. ექსცენტრიკული პერსონაჟების როლების შესრულებით განთქმული მსახიობი 2024 წლის 11 ივლისს გარდაიცვალა და სამუდამოდ დაიმკვიდრა სახელი კინოს ინდუსტრიაში.