ამერიკის კინოაკადემიის ჯილდოს - ოსკარის 97-ე დაჯილდოება ლოს-ანჯელესში, Dolby Theatre-ში 3 მარტს გაიმართა, რომელსაც წამყვანი კონან ო'ბრაიენი უძღვებოდა. ღონისძიებაზე წლის საუკეთესო ფილმად შონ ბეიკერის "Anora" დასახელდა, რომელმაც ყველაზე მეტი ჯილდო დაიმსახურა, მათ შორის - საუკეთესო ორიგინალური სცენარის, მონტაჟის, რეჟისორისა და საუკეთესო მსახიობი ქალის კატეგორიებში. ფილმის მთავარი როლის შემსრულებელი მსახიობი ქალი, რომელსაც ოსკარი ერგო, მაიკი მედისონია, მასთან ერთად ნომინაციაში წარდგენილი იყვნენ მსახიობები - დემი მური, ფერნანდა ტორესი, სინტია ერივო და კარლა სოფია გასკონი.
ტრიუმფატორი ფილმის შემდეგ ყველაზე მეტი ჯილდო ბრეიდი კორბეტის დრამამ "The Brutalist"-მა მიიღო, საუკეთესო მსახიობი კაცის ნომინაციაში გაიმარჯვა ედრიენ ბროუდმა, რომელიც მთავარი გმირის, უნგრელი არქიტექტორის - ლასლო ტოტის როლს ასრულებს, წლევანდელი გამარჯვებით ბროუდმა თავის სამსახიობო კარიერაში მეორე ოსკარი მოიპოვა. ფილმმა ასევე დაიმსახურა მთავარი ჯილდო ორ კატეგორიაში - საუკეთესო ოპერატორულ ნამუშევარსა და საუკეთესო ორიგინალურ მუსიკაში.
რაც შეეხება მეორეხარისხოვანი როლის საუკეთესო შემსრულებლებს, ქალთა კატეგორიაში გამარჯვებულად დასახელდა მსახიობი ზოი სალდანი, რომელმაც მონაწილეობა მიიღო მიუზიკლში - "Emilia Pérez". მამაკაცის მეორეხარისხოვანი როლის საუკეთესო შესრულებისთვის კი ჯილდო გადაეცა კირან კალკინს, ფილმისთვის - "A Real Pain".
ორი ჯილდო დაიმსახურა დენის ვილნევის "Dune"-ის მეორე ნაწილმა, რომელმაც საუკეთესო ხმისა და ვიზუალური ეფექტების კატეგორიაში გაიმარჯვა. ასევე ორი ჯილდო ერგო მიუზიკლს "Wicked" - საუკეთესო კოსტიუმების დიზაინისა და საუკეთესო პროდაქშენ დიზაინისთვის. კიდევ ერთი აღსანიშნავი ნომინაციაა - საუკეთესო საერთაშორისო ფილმი, რომლის გამარჯვებული ბრაზილიელი რეჟისორის, ვალტერ სალესის დრამა - "I'm Still Here" გახდა.
დაწერე კომენტარი