სასტუმრო „ტელეგრაფში“ Tatuza Jazz Club იხსნება

მალე თბილისს განსაკუთრებული და გამორჩეული სივრცე შეემატება.  სასტუმრო „ტელეგრაფში“ ჯაზკლუბი - Tatuza Jazz Club იხსნება, რომელიც თათუზას, ლეგენდარულ ჯაზმუსიკოსს - თამაზ ყურაშვილს ეძღვნება.

თამაზ ყურაშვილს განსაკუთრებული ადგილი უკავია ქართული ჯაზის ისტორიაში. უნიკალურმა შემსრულებელმა, პედაგოგმა და მენტორმა საქართველოში ჯაზის განვითარებას ჩაუყარა საფუძველი და ათეულობით ჯაზმუსიკოსის შემოქმედებითი გზა განსაზღვრა. თათუზას ოცნება, რომ საქართველოში მსოფლიო სტანდარტის ჯაზკლუბი ყოფილიყო, მისი გარდაცვალების შემდეგ ახდა. რუსთაველის გამზირზე, სასტუმრო “ტელეგრაფში” 15 სექტემბრიდან თათუზა ჯაზკლუბი ჯაზის ქართველი მოყვარულებისა და ქალაქის სტუმრებისთვის გახსნის კარს. 

Silk Road Group-ის დამფუძნებელი გიორგი რამიშვილი:   “ქართული ჯაზი წარმოუდგენელია თათუზას გარეშე. ის იყო ჩვენი უფროსი მეგობარი და ჩვენ წლების წინ შევთანხმდით, რომ თბილისში გაიხსნებოდა მისი სახელობის ჯაზკლუბი და თათუზა იქნებოდა მასპინძელი. სამწუხაროდ, თათუზა გახსნის დღეს ვერ მოესწრო, თუმცა მისი ოცნება ასრულდება და თბილისში იქნება უმაღლესი დონის ჯაზკლუბი, რომელიც მსოფლიოს წამყვან სცენებს არაფრით ჩამოუვარდება და უმასპინძლებს საერთაშორისო კლასის არტისტებს.

ჯაზკლუბის განვითარებაში და პროგრამის შედგენაში აქტიურად ჩაერთვება ცნობილი ამერიკელი აგენტი ჯოელ ქრისი - ჰემფტონის ჯაზფესტივალის თანადამფუძნებელი, რომელსაც მსოფლიოს ჯაზის სცენაზე ხანგრძლივი და წარმატებული კარიერა აქვს. ჯაზკლუბის პარტნიორები იქნებიან საქართველოში ჯაზფესტივალის მუდმივი ორგანიზატორი, კომპანია Eastern Promotions და ახალგაზრდა პრომოუტერი ლაშა გოჩიაშვილი, რომელიც კლუბის პროგრამის ქართულ მიმართულებას უხელმძღვანელებს. 

გამორჩეულია ჯაზკლუბის აკუსტიკა, რომელზეც  ფრანგმა არქიტექტორმა და აკუსტიკის სპეციალისტმა - ქსავიე ფაბრმა იშვიათი სპეციფიკური მასალების გამოყენებით იმუშავა. აღსანიშნავია კლუბის ინტერიერის დიზაინიც, რომელიც ქართველ დიზაინერს - ქეთუნა ყრუაშვილს ეკუთვნის. ჯაზკლუბის ტექნიკური და აკუსტიკური აღჭურვილობა თანამედროვე უმაღლეს სტანდარტებს აკმაყოფილებს. აუდიოსისტემაზე იმუშავეს მსოფლიო ლიდერებმა - L-Acoustics და Meyer Sound. განათებისა და მულტიმედიური ინფრასტრუქტურა კი უახლესი ტექნოლოგიებით არის აღჭურვილი. პროექტი ხორციელდება Silk Development-ის და Silk Hospitality-ის ჩართულობით. 

თათუზა ჯაზკლუბში პირველი კონცერტი ქართულ ჯაზსა და თათუზას მემკვიდრეობას ეძღვნება. 15 სექტემბერს სცენაზე წარდგებიან მსოფლიოში განთქმული მუსიკოსები: 

ბასისტი სტენლი კლარკი, დრამერი დენის ჩემბერსი და ქართველი პიანისტი ბექა გოჩიაშვილი. 

16 სექტემბრიდან კი კლუბი მრავალფეროვან პროგრამას და გამორჩეულ შემსრულებლებს წარუდგენს სტუმრებს. უკვე ცნობილია პროგრამა, რომლის ფარგლებშიც თბილისში სექტემბრის ბოლომდე ჩამოვლენ ცნობილი უცხოელი არტისტები. ჯაზკლუბი ასევე რეგულარულად დაუთმობს სცენას „House Band“-ებისა და ქართველი არტისტების კონცერტებს. 

ბილეთების შეძენა შესაძლებელია tkt.ge-ზე

სრული პროგრამის სანახავად ეწვიეთ ბმულს: https://telegraphhotel.com/restaurants-bars/tatuza-jazz-club/