მილანის მოდის კვირეულზე იტალიურმა მოდის სახლმა Dolce & Gabbana-მ, დომენიკო დოლჩესა და სტეფანო გაბანას ხელმძღვანელობით, 2025 წლის შემოდგომა-ზამთრის კოლექციის ჩვენება გამართა, რომელიც მატილდა გვარლიანმა დახურა. ჩვენება მილანში მდებარე Metropol Theater-ში გაიმართა, სადაც ქართველი მოდელი ორი ერთმანეთისგან განსხვავებული ლუქით - ფერადი თვლებით გაფორმებული კაბით და ხელოვნური ბეწვის მოსაცმლით გამოჩნდა, რომელიც დიდი ზომის მაისურსა და ტყავის ჩექმებთან ერთად მოირგო.
Dolce & Gabbana-ს ჩვენება, რომელიც მუსიკალურად ვიქტორია დე ანჯელისმა გააფორმა, ვიტორია ჩერეტიმ გახსნა. ასევე მონაწილეობდნენ მოდელები ირინა შეიკი და ამელია გრეი. ახალი კოლექციის კონცეფციას - "Cool Girls" წარმოადგენდა - დიზაინერების შთაგონების წყარო სწორედ ის მოდელები გახდნენ, რომლებიც ჩვენებაზე ვიხილეთ და ბრენდის კამპანიებში ხშირად ჩნდებიან. მათი ყოველდღიური ჩაცმულობის სტილი და ინდივიდუალიზმი კოლექციის მთავარი ელემენტი და ინსპირაცია გახდა. ახალ კოლექციაში წარმოდგენილი იყო დიდი ზომის მაისურები, ჯინსის შარვლები, ტყავის და ბეწვის ქურთუკები, დახეული ჯინსები და მაღალყელიანი ჩექმები, ასევე მაქმანებიანი კაბები, დახვეწილი დეტალებით, პრინტებით, კრისტალებითა და მძივებით გაფორმებული სამოსი. სწორედ ერთმანეთისგან განსხვავებული სტილის შერწყმამ, ტრადიციებისა და თანამედროვე ელემენტების გაერთიანებამ ქალების მრავალმხრივი და საინტერესო ბუნება წარმოაჩინა. Dolce & Gabbana-ს მიზანი იყო იმის ჩვენება, თუ როგორ შეუძლიათ ქალებს სამოსით გამოხატონ ინდივიდუალური ხასიათი, ელეგანტურობა.
დაწერე კომენტარი