ზუმერის CMO და ბრენდის ხელმძღვანელი თათია თუთიკო მუჯირი:

ზუმერის ბრენდის ისტორიაში პირველად გადავწყვიტეთ გამოვხმაურებოდით ქალების როლს და წამოგვეწია წინ ის იმგვარად, როგორც ეს კამპანიის შინაარსებში ხმამაღალი განცხადებებით ჟღერს, რადგან ქალების ხმა დღეს ყველაზე ძლიერად ისმის. ზუმერის განახლებული სტრატეგიული პლატფორმის პირობებში, ცვლილება და ამ ცვლილებით განცდილი პროგრესი მნიშვნელოვან საკომუნიკაციო ტერიტორიას წარმოადგენს - ქალების ძალა კი, ზუსტად ის ძალაა, რომელიც ოდითგანვე სასიკეთო ცვლილებას ქმნიდა, ქმნის და ასე იქნება მომავალშიც. ბრიფის წერისას, მნიშვნელოვანი იყო ადამიანისთვის დამახასიათებელი განცდების მსგავსი Bold კამპანია შექმნილიყო და ხაზი გაგვესვა გარემოში ქალების თანაბარ მნიშვნელობაზე, შესაბამისად, მისი მთავარი ამოცანაც ასე იწყებოდა: “ქალებს გაძლიერება არ სჭირდებათ, რადგან ისინი ისედაც ძლიერები არიან, ის, რაც უნდა შეიცვალოს მხოლოდ გარემო და დამოკიდებულებებია…” ბრიფის უზუსტესი პასუხით, რაც სააგენტო სუპერმარკეტის სადებიუტო ნამუშევარში ვიხილეთ, სულსწრაფად მოვიხიბლეთ. კამპანია მესიჯით - “ყველა ქალი აღსანიშნავია” ახდენს იმ გარემოს პროექციას, სადაც შესაძლებლობები სხვის მიერ კონსტრუირებული მხოლოდ რჩეული და ერთეული ქალების ხვედრი კი აღარ იქნება, არამედ იქნება ყველას - რადგან ყველა ქალი შესანიშნავია, აღსანიშნავია და დასაფასებელია. შესაბამისად, კომუნიკაცია დაცლილია კონტროვერსიული ჩანაფიქრებით და მისი ვიზუალურად ვარდისფერ სიმბოლოში გამოვლინებაც იმ სტერეოტიპის, სადაც ქალის ფერი მხოლოდ ვარდისფერია, განსხვავებულად გამოყენებას და მისი გავლით ქალის ძალის ჩვენების მიზანს ემსახურება. მიხარია, რომ ეს კომუნიკაცია ზუმერის ბრენდის ახალ ინდივიდუალურ შტრიხებს მნიშვნელოვნად კვეთს და, რაც მთავარია, აქამდე აუთვისებელ ზონებში ამაყად მიუყვება მას. ისღა დაგვრჩენია, ეს მონდომება გრძელვადიანად და უფრო ხელშესახებ ქმედებებში ითარგმნოს, რათა შექმნას დამატებითი რეალური გავლენები გარემოზე.


სააგენტო სუპერმარკეტის თანადამფუძნებელი და შემოქმედებითი ხელმძღვანელი ეკა ყიფიანი:

ქალებს ძალა არ აკლიათ. უბრალოდ ხშირად გარემო ამ ძალას უფრთხის, ზღუდავს, აშინებს, ებრძვის. ზუმერის კამპანიაც სწორედ ამ თემის წამოწევას ემსახურება - ხმამაღლა და მკაფიოდ საუბარს თემაზე, რომელსაც, როგორც წესი, ბრენდები იშვიათად უსვამენ ხაზს. კამპანიის ვიზუალური სიმბოლო შემთხვევით არ შერჩეულა - ვარდისფერი ბოლი აქ ქალურ ძალას გამოხატავს. იდეა კი გაჩნდა ე.წ. სქესის გაგების ცერემონიებიდან, სადაც ვარდისფერი გოგოს, ხოლო ცისფერი - ბიჭის სქესს აღნიშნავს. სამწუხაროდ, რიგ შემთხვევებში დღემდე ცისფერი ფერის დანახვა უფრო აღმატებულ ემოციებს იწვევს, ვიდრე - ვარდისფრის. ვიდეოში ვარდისფერი ბოლი ყველგან შეინიშნება - როგორც ბუნებრივ, ისე არაბუნებრივ მასშტაბურ გარემოში: ბუნებაში, პერსონაჟების ხელებში, ნივთებთან, სივრცეში… ქალის ძალას ვხვდებით ყველგან. საბოლოოდ, ვიდეო სრულდება გზავნილით, რომ გვჭირდება გარემო, რომელშიც არამხოლოდ “რჩეული” ქალები, არამედ ყველა შეძლებს საკუთარი შესაძლებლობების მაქსიმალურად გამოვლენას, რადგანაც ერთეულები კი არა - ყველა ქალი აღსანიშნავია. აღსანიშნავი ისიცაა, რომ ზუმერის სარვამარტო კამპანია ახლადშექმნილი სააგენტო “სუპერმარკეტის” სულ პირველი ნამუშევარია, რაც ჩვენთვის ერთიორად ზრდის მის მნიშვნელობას. ასევე, ძალიან გვახარებს ფაქტი, რომ ეს სადებიუტო ჩანაფიქრი სწორედ ჩვენმა დიდი ხნის მეგობრებმა გააცოცხლეს - ფროდაქშენ კომპანია “ინდუსტრიამ” და რეჟისორმა დათო ბორჩხაძემ. მოკლედ, არაერთი აღსანიშნავი რამ დაგროვებულა.