Art Basel Hong Kong ხელოვნების ერთ-ერთი მნიშვნელოვანი ფესტივალი უკვე გაიხსნა. წლევანდელ ფესტივალზე წარმოდგენილია ქართველი ხელოვანის - ვაჟიკო ჩაჩხიანის ნამუშევარი, სახელწოდებით ‘’Lower Than the Sky’’, რომელსაც დამთვალიერებელი 30 მარტის ჩათვლით ჰონგ-კონგის კონვენციისა და საგამოფენო ცენტრში იხილავს.

ნამუშევარი, რომელზეც საღამოს მშვიდ, წყნარ ზღვაზე და ცის ფონზე მოცურავე ორ გემს ვხედავთ, ნარატიული მნიშვნელობისაა. ვაჟიკო ჩაჩხიანის ნამუშევარი ეხმიანება მიგრაციისა და გადაადგილების მარადიულ ციკლს და პეიზაჟზე გადმოტანილ ისტორიას ასახავს. მისი შემოქმედება ხშირად ხაზს უსვამს ისეთ პრობლემებს და თემებს, როგორებიცაა საზღვრების ცვლა, ადამიანის ტრავმა და გამძლეობა. ხელოვანის კინემატოგრაფიული, ვიზუალური ენა აცოცხლებს ცხოვრებისეულ გამოცდილებებს, მათ შორის საქართველოს კულტურულ და მითოლოგიურ მემკვიდრეობაში ფესვგადგმულ - მასობრივი მიგრაციის თემას, რომელიც მუდმივ კრიზისად და ადამიანურ გამოცდილებად ითვლება. სწორედ ამ ნამუშევარში ზღვა, როგორც გადასასვლელი და ბარიერი, ხდება მეტაფორა ფსიქოლოგიური პეიზაჟისთვის და საერთო ჯამში, ერთ ნამუშევარში ექცევა ისტორია, მეხსიერება და ადამიანის სისუსტე.