იტალიური მოდის სახლმა Prada-მ აზიაში პირველი რესტორანი - Mi Shang Prada Rong Zhai გახსნა, რომელიც ცნობილ ჰონგკონგელ რეჟისორთან, Wong Kar-wai-სთან თანამშრომლობით შეიქმნა და მდებარეობს ისტორიულ რონგ ჟაის სასახლეში, ზედმიწევნით აღდგენილ 1918 წლის რეზიდენციაში. რესტორნის სახელწოდება ჩინური ფრაზიდან, "mi shang"-იდან მომდინარეობს, რაც ქართულად შეპყრობილს ნიშნავს და ასახავს სივრცის ელეგანტურ ატმოსფეროს.
რესტორნის დიზაინზე მნიშვნელოვან გავლენას ახდენს Wong Kar-wai-ს კინემატოგრაფიული ხედვა, ინტერიერის ნაწილი მისი ცნობილი ფილმების, Mood for Love-ისა და Happy Together-ის ესთეტიკას მოგვაგონებს. გარდა ამისა, სივრცე შთაგონებულია რეჟისორის სიყვარულით შანხაისადმი და ფილატელიური მოტივით - "tête-bêche", რომელიც წარმოადგენს საფოსტო მარკებს, ერთმანეთის საპირისპირო მიმართულების ორიენტირებითა და გამოსახულებებით. სწორედ ეს ელემენტი ხდება სიმბოლო კულტურული ხიდისა მილანსა და შანხაის შორის. რესტორანი მიზნად ისახავს ვიზუალურად წარმოაჩინოს ქალაქების დიალოგი და მათი განსხვავებული, მრავალფეროვანი კულტურები.
სივრცე აერთიანებს სარკისებურ ზედაპირებს და კონტრასტულ ელემენტებს, მათი ურთიერთქმედება ქმნის კომფორტულ და ელეგანტურ ატმოსფეროს, სადაც ჩინური და იტალიური ესთეტიკა იკვეთება, ისტორიულ ნაგებობაში მდებარეობა კი რესტორნის ტრადიციებისა და თანამედროვეობის შერწყმას უსვამს ხაზს. Mi Shang Prada Rong Zhai აერთიანებს იტალიური და ჩინური სამზარეულოს კულინარიულ ტრადიციებს, საუზმის, ლანჩისა და ვახშმის მენიუს და საღამოს მრავალფეროვან კოქტეილებს.
ფოტო: Prada
დაწერე კომენტარი