ვოლფგანგ ტილმანსის ახალი გამოფენა პომპიდუს ცენტრში

13 ივნისს პარიზში, პომპიდუს ცენტრში ცნობილი გერმანელი არტისტის გამოფენა გაიხსნა, სახელწოდებით „Rien ne nous y préparait – Tout nous y préparait“,  რომელიც დამთვალიერებლებს 22 სექტემბრის ჩათვლით უმასპინძლებს. ტილმანსის ნამუშევრები პომპიდუს ცენტრის ბიბლიოთეკის მთელ სივრცეს იკავებს, ამგვარი განლაგებითა და ექსპერიმენტით კი არტისტი მის შემოქმედებასა და ბიბლიოთეკის სივრცეს შორის დიალოგს აყალიბებს.

რეტროსპექტიული გამოფენა ხაზს უსვამს ტილმანსის ოცდათხუთმეტ წელზე მეტ პრაქტიკას და გამოცდილებას. გამოფენაზე წარმოდგენილია პორტრეტები, ნატურმორტები, დოკუმენტური სურათები და აბსტრაქტული ნამუშევრები, აგრეთვე ტილმანსის კრებულის, Tillmans' Reader-ის ფრანგულ ენაზე ნათარგმნი ვერსია.

გამოფენაზე წარმოდგენილ ნამუშევრებს შორის არის 2015 წლის ‘’Moon in Earthlight’’, ‘’The State We're In, A’’ და ‘’Frank, in the shower’’ -  Frank Ocean-ის ალბომის, Blonde-ის ყდა. აღსანიშნავია, რომ ვოლფგანგ ტილმანსის გამოფენის დასრულების შემდეგ ცენტრი დაიხურება ხუთწლიანი რესტავრაციისთვის. ბოლო წლების განმავლობაში ტილმანსის ნამუშევრები გამოიფინა ლონდონში, Tate Modern-ში და ნიუ-იორკში, MoMA-ს მუზეუმში.