იურგენ ტელერმა დემნა გვასალიას მილანური რეზიდენცია გადაიღო - სივრცე, რომელიც დიზაინერის შემოქმედებითი ხედვისა და პირადი ისტორიის ერთგვარი გაგრძელებაა.
დემნას სახლის ინტერიერი პოსტსაბჭოთა ესთეტიკას, იტალიური პალაცოების კლასიკურ ელემენტებსა და ვინტაჟურ ავეჯს აერთიანებს. ყვავილებიანი შპალერი, ორნამენტული ხალიჩები, რენესანსის სტილის ჭაღები, მოოქრული სარკეები და ძველი დივნები ქმნის ეკლექტიკურ გარემოს, სადაც ფუფუნება და ყოველდღიური ყოფის ესთეტიკა ერთმანეთის გვერდით თანაარსებობს.
განსაკუთრებულ ყურადღებას იქცევს სასადილო ოთახში გამოფენილი 1983 წლის საბჭოთა პროპაგანდისტული ფერწერული ნამუშევარი, რომელიც დიზაინერის საქართველოში გატარებულ ბავშვობას უკავშირდება. ინტერიერში იგრძნობა ბებიის გავლენაც, რომლის ინდივიდუალური და ექსცენტრული ჩაცმის სტილი დემნასთვის მოდით დაინტერესების ერთ-ერთი პირველი შთაგონება გახდა.
სივრცე შეგნებულად უარყოფს ერთიან დიზაინერულ სტილს - ისევე, როგორც დემნას შემოქმედება Vetements-ში, Balenciaga-სა და ახლა უკვე Gucci-ში. აქ ერთმანეთს უპირისპირდება ძველი და ახალი, უბრალო და მდიდრული, ნოსტალგიური და თანამედროვე.
იურგენ ტელერის ფოტოებზე დემნას მილანური სახლი მხოლოდ საცხოვრებელი სივრცე არ არის - ეს მისი ესთეტიკური სამყაროს პირადი მანიფესტია, სადაც ფუფუნებისა და ანტიფუფუნების თანაარსებობა დიზაინერისთვის დამახასიათებელ ვიზუალურ ენას ქმნის.
დაწერე კომენტარი