მარიო ტესტინოს თვალით დანახული რიო დე ჟანეირო

2009 წელს ცნობილმა ფოტოგრაფმა მარიო ტესტინომ წიგნი "Mario de Janeiro Testino" გამოსცა, რომელიც იდეალურად აღწერს ქალაქის მარადიულ ესთეტიკასა და ენერგიას - ერთდროულად ქაოსურსა და მშვიდს. წიგნი მარიო ტესტინომ ბრაზილიის, მისი კულტურის, ხალხის, ენერგიის სიყვარულითა და კოპაკაბანას სანაპიროზე დამსვენებელი ახალგაზრდების შთაგონებით შექმნა.

"Mario de Janeiro Testino" ასახავს ტესტინოს ღრმა პიროვნულ კავშირს ბრაზილიასთან და ერთ-ერთ ყველაზე საკულტო ქალაქ რიო დე ჟანეიროსთან. პერუში დაბადებულმა ფოტოგრაფმა ცხოვრების მნიშვნელოვანი წლები ლათინურ ამერიკაში გაატარა და ადრეული ასაკიდან მუდმივად აფასებდა და პატივს სცემდა კონტინენტის სილამაზესა და უწყვეტ რიტმს. რიო დე ჟანეიროსადმი მისი გატაცება კი პირველი საზაფხულო არდადეგებისას დაიწყო - "როდესაც 14 წლის ვიყავი, არდადეგებზე ჩამოვედი, სახლიდან სანაპიროზე მივდიოდი და ვხედავდი, რომ გარშემო ყველა თავისი საცურაო კოსტიუმით დადიოდა, გოგოები და ბიჭები ისეთი უდარდელი და თავისუფლები იყვნენ, რომ უბრალოდ არ მჯეროდა..." 

ამგვარად, ქალაქის სიყვარულით, ტესტინომ ფოტოგრაფიული მოგზაურობა შემოგვთავაზა - წიგნში ერთდროულად თავი მოუყარა მოდას, დოკუმენტურ მასალას, მხატვრულ პორტრეტებს, ტროპიკულ პეიზაჟებს და ბევრ დამსვენებელსა და ადგილობრივს. "Mario de Janeiro Testino" აერთიანებს ფოტოებს იპანემას ოქროს პლაჟიდან და მზის ჩასვლის თვალწარმტაცი პანორამული პეიზაჟებიდან, რიო დე ჟანეიროს ყველაზე ცნობილ და ენერგიულ კარნავალამდე. ფოტოკრებულის მთავარი სახეა ბრაზილიელი სუპერმოდელი ჟიზელ ბუნდჰენი, რომლის პორტრეტები და დასამახსოვრებელი ენერგია მთელ წიგნში გვხვდება.

ფოტოს წყარო: Mario Testino