მილანის დიზაინის კვირეულზე Saint Laurent მე-20 საუკუნის ფრანგი არქიტექტორისა და დიზაინერის, შარლოტა პერიანის ავეჯის იშვიათ მოდელებს წარმოადგენს. გამოფენა - ‘’Saint Laurent-Charlotte Perriand’’ 1943-1967 წლებში შექმნილ ნამუშევრებს აერთიანებს, რომელთაგანაც ზოგიერთი მხოლოდ პროტოტიპების ან ჩანახატების სახით არსებობდა. მოდის სახლის მიერ ენტონი ვაკარელოს ხელმძღვანელობით ავეჯი დიზაინის გამოფენაზე გაცოცხლდება და ლიმიტირებულად გამოიცემა. გამოფენა Salone del Mobile-ს ფარგლებში მილანის Padiglione Visconti-ში 8 აპრილს გაიხსნება და დამთვალიერებლებს 13 აპრილამდე უმასპინძლებს.
პერიანის Saint Laurent-თან კავშირი მნიშვნელოვანია იმითაც, რომ მოდის სახლის დამფუძნებელი - ივ სენ ლორანი წლების განმავლობაში დიზაინერის გულშემატკივარი იყო და მის ავეჯის კოლექციაში პერიანის არაერთი ნამუშევარი მოხვედრილა. გამოფენის ერთ-ერთი მნიშვნელოვანი ნაწილია La Banquette de la Résidence, 1967 წლის ნამუშევარი, ხუთადგილიანი დივანი, რომელიც პარიზში იაპონიის ელჩის რეზიდენციისთვის შეიქმნა. ასევე შეხვდებით 1963 წლის La Table Mille-Feuilles - ათი ფენისგან შემდგარ მაგიდას, რომელიც თავდაპირველად ზედმეტად რთულ დიზაინად ითვლებოდა წარმოებისთვის და ათწლეულების განმავლობაში ავეჯის ჩანახატი პერიანის სამუშაო მაგიდაზე ინახებოდა.
გამოფენაზე წარმოდგენილი იქნება La Bibliothèque Rio de Janeiro - კარადა, რომელიც პერიანმა მისი მეუღლის, ჟაკ მარტინისთვის როგორც წიგნების, ასევე ნამუშევრების შესანახად 1962 წელს შექმნა. კარადის ორიგინალი ვერსია ბოლო ოცდახუთი წლის განმავლობაში მხოლოდ სამჯერ იყო გამოფენილი. კიდევ ერთი ავეჯი, რასაც გამოფენაზე ვიხილავთ, 1943 წლის Le Fauteuil Visiteur Indochine სავარძელია, რომელიც პერიანმა ვიეტნამში მუშაობისას შექმნა. წლების განმავლობაში სავარძელი დაიკარგა, შესაბამისად, Saint Laurent-მა ის ილუსტრაციის დახმარებით ზედმიწევნით აღადგინა.
დაწერე კომენტარი