ივ სენ ლორანი და მოდის ფოტოგრაფია - გამოფენა პარიზში

პარიზში, Rencontres d’Arles ფესტივალის ფარგლებში, მასშტაბური გამოფენა, სახელწოდებით “ივ სენ ლორანი და მოდის ფოტოგრაფია’’ გაიხსნა, რომელიც ლეგენდარული დიზაინერის ნამუშევრებს, მე-20 საუკუნის ცნობილი მოდის ფოტოგრაფების მიერ გადაღებულ ფოტოსურათებსა და 200-ზე მეტ საარქივო ნიმუშს აერთიანებს. გამოფენა ივ სენ ლორანის პარიზის მუზეუმთან და Fondation Pierre Bergé-Yves Saint Laurent-თან თანამშრომლობით იმართება და დამთვალიერებლებს 5 ოქტომბრის ჩათვლით უმასპინძლებს. გამოფენა ხაზს უსვამს ივ სენ ლორანის ღრმა კავშირს ფოტოგრაფიასთან, მის შემოქმედებით ხედვას, რომელმაც შექმნა ბრენდის იდენტობა და მარადიული სტილი. 

ივ სენ ლორანის ფოტოგრაფიისადმი სიყვარული და ინტერესი მთელი თავისი კარიერის მუდმივი მახასიათებელი იყო, იგი წლების მანძილზე თანამშრომლობდა ისეთ ფოტოგრაფებთან, როგორებიც არიან ირვინგ პენი, რიჩარდ ავედონი, ჰელმუტ ნიუტონი, ვილიამ კლეინი, ჟანლუპ ზიფი. სწორედ ამ და სხვა ფოტოგრაფების ნამუშევრებს შეხვდებით გამოფენაზე. 80-ზე მეტი საკულტო ფოტო არა მხოლოდ სამოსსა და სტილს, არამედ ივ სენ ლორანის ეპოქებსა და განვითარებას ასახავს. გამოფენაზე წარმოდგენილ ცნობილ ნამუშევრებს შორის არის 1957 წელს ირვინგ პენის მიერ გადაღებული ივ სენ ლორანის პორტრეტი, როდესაც ახალბედა დიზაინერი ფრანგული მოდის ახალ ხედვას ქმნიდა.

აქვე შეხვდებით უილიამ კლაინის 1962 წლის ექსპერიმენტულ ფოტოსერიას, პიტერ კნაპის გადაღებულ ფოტოს ჟურნალ ELLE-სთვის, რომელზეც გამოსახული არიან მოდელები 1965 წლის შემოდგომა-ზამთრის კოლექციის - “Homage to Piet Mondrian”-ის კოქტეილის კაბებით, ჰარი მერსონის 1966 წლის პორტრეტსა და გი ბურდენის ობიექტივში მოხვედრილ მოდელებს, 1976 წლის “Opéras - Ballets russes” შემოდგომა-ზამთრის კოლექციით, რომელიც ფოტოგრაფმა Vogue-სვის გადაიღო. როგორც კურატორი საიმონ ბეიკერი აღნიშნავს, ივ სენ ლორანი იყო არა მხოლოდ დიზაინერი, არამედ „ფოტოგრაფიით შეპყრობილი“ საკუთარი ვიზუალური ნარატივის კურატორი.

გამოფენა რეტროსპექტივასთან რთად, არის განსახიერება იმისა, თუ როგორ შეეძლო ივ  სენ ლორანის გამორჩეულ ხედვას ხელახლა განესაზღვრა მსოფლიო მოდა და შეექმნა სრულიად ახალი, მარადიულად დასამახსოვრებელი ისტორია ამ ინდუსტრიაში. გამოფენა ხაზს უსვამს მჭიდრო კავშირსა და დიალოგს მოდასა და ფოტოგრაფიას შორის, ასახავს საუკუნოვან ისტორიას. ექსპოზიციის მნიშვნელოვანი ნაწილია ‘’Cabinet of Curiosities’’, რომელიც აერთიანებს 200-ზე მეტ საარქივო ნიმუშს და მნიშვნელოვან მასალას - კამპანიის კატალოგებიდან დაწყებული, პერსონალური პოლაროიდებითა და ჩანაწერებით დამთავრებული.

ფოტოს წყარო: Musée Yves Saint Laurent Paris