იაპონიაში, კუნძულ ჰონსიუს სამხრეთ ნაწილში მდებარე ქალაქ კურასიკიში კულინარიული ბუტიკ-სასტუმრო - Yoruya Kurashiki გაიხსნა, სადაც ისტორია და თანამედროვე კულტურა ერთმანეთს ერწყმის. 13-ნომრიანი ბუტიკ-სასტუმრო 110-წლიანი ისტორიის მქონე შენობაშია განთავსებული. საუკუნის წინ აშენებული ნაგებობა ინარჩუნებს მის თავდაპირველ მახასიათებლებს და ინტერიერის დიზაინი ჰარმონიულად აერთიანებს ტრადიციულ იაპონურ სტილს თანამედროვე დეტალებთან. Yoruya-ს მთავარი ნაწილი კულინარიაა - აქ ადგილობრივ სეზონურ კერძებზე დაფუძნებული სამზარეულო, რესტორანი და ღვინის ბარი მდებარეობს, რომელიც სასტუმროში სტუმრობას განსაკუთრებულს და დასამახსოვრებელს ხდის.
თავდაპირველად, 110 წლის წინ, შენობაში ფუნქციონირებდა კიმონოს მაღაზია, მოგვიანებით კი ადგილობრივებისთვის საყვარელ რიოკანად - ტრადიციული იაპონურ სასტუმროდ გადაკეთდა. საუკუნოვან ნაგებობას ახალი სიცოცხლე Simplicity Design Studio-მ შესძინა, რომელმაც Yoruya-ს განახლებულ დიზაინზე იმუშავა. სტუდიის გუნდმა ზედმიწევნით განაახლა ტრადიციული ავთენტური სტრუქტურები და შეიმუშავა ორი დამატებითი ახალი სივრცე, შთაგონებული იაპონური ‘’Edo’’ და ‘’Meiji’’ ეპოქებით. სივრცეები ერთმანეთს გადასასვლელებით, ერთგვარი ბილიკებით უკავშირდება, მსგავსი განლაგება კი სტუმრებს შესაძლებლობას აძლევს სასტუმროს სამ განსხვავებულ იდენტობას გაეცნონ.
ისევე როგორც ქალაქ კურასიკის სხვა უამრავ ნაგებობას, Yoruya-შიც აგურისა და თაბაშირის კედლებს, ტატამის იატაკს, ხის პანელებსა და სვეტებს შეხვდებით. აქვეა პატარა ხეივანი, რომელიც ადგილობრივებისთვის ცნობილია, როგორც "ჰიასაი". თბილ პალიტრასა და მინიმალისტურ დიზაინში გადაწყვეტილი 13 ნომერი დაყოფილია სხვადასხვა კატეგორიის ოთახებად, რომლებიც ორ ტრადიციულ ხის შენობაში და ორ ახალ დამატებით კორპუსშია განლაგებული. ინტერიერის დიზაინში როგორც მრავალწლიან ისტორიასა და ტრადიციებს, ისე თანამედროვე სტილს ამოიკითხავთ - ოთახები გაფორმებულია ბუნებრივი ტექსტურებით, სპეციალური ავეჯით და რაც მთავარია, აქვთ ხედი შიდა ბაღზე, რაც მათთვის ბუნებრივი სინათლის წყაროს ქმნის.
სასტუმროს დიზაინში მნიშვნელოვანი ყურადღება ექცევა ხელოვნებასაც, აქ შეხვდებით არაერთი იაპონელი ხელოვანის მიერ შექმნილ უნიკალურ ნამუშევარს. მათ შორისაა მთელ სასტუმროში განთავსებული Kota Miyake-ის კერამიკული ნამუშევრები, Maki Takeuchi-ის ქანდაკებები, Sunami Toru Shoten-ის ქსოვილები და Yamanone Glass-ის მინის ხელნაკეთი ჭურჭელი. რაც შეეხება Yoruya-ს გასტრონომიულ მხარეს, სასტუმროში არის რესტორანი, რომელიც ტრადიციული იაპონური კვების კულტურას - “კაისეკის” ეფუძნება, აქ თითოეული კერძი სეტოს ზღვაში მოპოვებული უახლესი ზღვის პროდუქტებით, უმაღლესი ხარისხის სეზონური პროდუქციითა და ინგრედიენტებით მზადდება, რომელსაც შეფმზარეული Fumio Niimi უძღვება. აქვეა ღვინის ბარიც, სადაც წარმოდგენილია ადგილობრივი და მსოფლიოს სხვადასხვა ქვეყნის ღვინოების მრავალფეროვანი არჩევანი და, რა თქმა უნდა, საკე.
ფოტო: Yoruya Kurashiki
დაწერე კომენტარი